søndag, desember 09, 2007

Julebord på Horgo

Hallo padlevenner!

Bergen Havpadleklubb planlegger julebord på Horgo i Austevoll - i Bergen og Omlands Friluftslivs hus - lørdag 15 desember kl 19.00. Vi er en liten gjeng i BHK, ca 6-7 padlere som padler ut til Horgo enten fredag 14 el lørdag 15 og varmer opp huset slik at vi kan ha et hyggelig lag - et "julebord" - før vi overnatter, spiser frokost og padler en fellestur søndag. Alle tar med seg forskjellig mat som vi kan sette på bordet, gjerne sjømat - og noe til dessert/kaffen og til frokost søndag. Vi må også ta med ved!

Mulighetene til å komme seg ut der er jo varierte; padle hele veien eller benytte ferjene et stykke. Detaljer om dette kan dere få ved å ringe undertegnede på førstkommende torsdag/fredag. Invitasjonen blir også sendt til de andre klubbene "rundt" Horgo, nemlig Os Internasjonale Kajakklubb, Sunnhordland Kajakklubb og Havstril Padleklubb.

Turen vil bli avlyst torsdag kveld hvis værutsiktene er for dårlige.
Vi vil gjerne at dere sender en påmelding, spesielt siden det er begrenset med sengeplasser i huset og derfor må ev. supplere med lavvo/telt.

Med vennlig hilsen
Bergen Havpadleklubb
v/ Hans Ove Galtung
90217705

tirsdag, desember 04, 2007

T-skjorte på veg


Me er i ferd med å få prisar på t-skjorter og hettegensrar. Tinging kan gjerast saman med kontigenten litt over nyttår.

fredag, november 23, 2007

onsdag, november 21, 2007

T-skjorte på veg

Padleklubben er i ferd med å få utforma ei t-skjorte med padle- og austevollsmotiv som me kjem til å senda ut tilbod på saman med kontigentfornying, årsmelding og rekneskap. Meir informasjon kjem på nettsida om kort tid.

tirsdag, oktober 16, 2007

Slutt på torsdagspadling

Når solnedgang er i 18-tida, nyttar det lite å padla på anna enn føremiddag og sjølve dagen. Me set dermed strek for torsdagspadling, men tek oppatt åra i mars neste år. I mens vert det truleg ein og annan helgetur. Føl med på bloggen!

Me vil gjerne ha innspel om korleis me kan gjera klubben betre. Send inn tips på e-post eller i boksen til venstre.

søndag, oktober 07, 2007

Heimesida oppdatert

Rune har oppdatert heimesida, mellom anna med info om "horgekalven". I samband med namnet på denne båten vurderte me ei stund å døypa K2-en om til Horgo :-)

mandag, oktober 01, 2007

Torsdag frå Beinskrokjen

Sidan veret vert bra og eit par sjeler har lyst til å padla, tek me sjansen på å bebuda padling frå Beinskrokjen klokka 18:00. Tek med nokre ekstra lanterner, sidan skumringa sikkert kjem innan me er attende. Litt sønnavind gjer at me satsar på Drøns- og Busepollen.

Nuggets på Ut i naturen

Våre gode vener i Ut i naturen i Stavanger har flytta inn i nye lokale, og har stortilbod denne veka. Sjekk ut nettstaden.

tirsdag, september 18, 2007

Live-chat om padling

Sjå til venstre. Her kan me kommunisera meir direkte med kvarandre. Eg har t.d. lyst til å padla Haukanespollen no som haustfargane er på veg.

torsdag, september 13, 2007

Interesse for torsdagspadling

Kveldane ver5t kortare, lauva fell av trea, og det vert kaldarer i både luft og sjø. Hausten kan vera ei fin tid å padla på, men skal me halda fram med torsdagspadlingane i nokre veker til, må me starta klokka 18:00. I dag kom det ingen, bortsett frå leiaren, som hadde seg ein liten rundtur inne i Storebøvika etter å ha kostatert at sønnavinden friska på. Viss det ikkje kjem indikasjonar om at folk ønsker tilbodet om fellespadligar på kvardagar så seint i sesongen, skrinleggjer me dei fram til neste sesong, og satsar i staden på ein og annan føremiddagshelgetur når vêrmeldingane er glitrande. Skriv gjerne ei melding under om du har innspel, eller send ein e-post til info@havstrilpadleklubb.no

mandag, september 10, 2007

Ein del utstyr teke bort

Grunna svinn frå klubbhuset, tek me ein del av utstyret bort derifrå inntil vidare. Vestar, årer og kajakkar blir framleis å finna der, og me merkar utstyret retteleg godt så lenge.

Frå Gråsidalen

Det vert endå tidlegare mørkt, og me får difor satsa på avpadling klokka 18.00 på torsdag. Det er meldt sønnavind, men det kan sjølvsagt endra seg. Alt etter tilhøva, padlar me gjerne gjennom Drønspollen til Busepollen og heim att (vestom Drøno viss sønnavinden er moderat).

Diodelanterner til sals


Me har nokre lanterner til bruk på båt/vest etc. til sals til sjølvkost. Kr 110 per stykk. Me har dei i raudt og kvitt. Dei veg nokre få gram og er synlege på opptil 1,5 kilometers avstand.

onsdag, september 05, 2007

Padling viss interesse

Dersom nokon er interesserte i å padla på torsdag - gje ei melding i form av sms, telefon eller e-post så finn me på noko. Det har vore skrøpeleg oppmøte i det siste, men dersom noko vil ut går det sjølvsagt kjempe.

mandag, september 03, 2007

Etterlysing!

Me saknar eitt stykk pumpe og ein årepose frå naustet. Har du ufråverande teke dei med deg? Gje oss melding om dette snarast :-)

Ingen Huftarøy Rundt

Grunna det ofseleg lite padlevekkjande vêret på laurdag vart det ikkje noko av turen rundt Huftarøy. Til neste sesong kjem me truleg til å ta slike turar meir på sparket i staden for å setja ein dato der ein er prisgitt godt vêr. Difor bør ein følgja ekstra godt med på denne ringe sida.

fredag, august 31, 2007

Lite oppmøte i finevêret


Berre tre havstrilar padla litt rundtomkring på torsdag. Grunna ein litt kald nordavind skinla me planane om Drøna rundt, og koste oss i staden litt i Småstraumane, som denne gangen var langt raskare og utfordrande enn for ei veke sidan. Det går no mot slutten av torsdagspadlingane. I midten av oktober vert det for mørkt til at det er realistisk å halda fram. I staden forsøkjer me oss på ei og anna padleøkt i helgane. Neste veke vert det òg frammøte klokka 18:30.

onsdag, august 29, 2007

Huftarøy rundt

Me har framleis planar om å padla rundt øya. Akkurat no ser ikkje vêrmeldingane så ille ut. Vestleg 3 m/sek på laurdag med ein og annan regndråpe, og sundag med solgløtt og 8 m/sek vestleg vind gjer at turen skulle vera grei skuring for dei fleste. Men me treng konkret attendemelding frå dei som vil vera med innan fredag! Ring Rune H. på tlf 992 63 886

Drøno rundt?

Møt opp klokka 18:30 på torsdag. Dersom vêrmeldingane heød seg, er det nærliggjande å ta turen frå Gråsidalen og rundt Drøna. 5 sekundmeter frå sørvest og solgløtt kan kanskje få det tilø å rykkja i padlemuskelen til noko og ein kvar?

søndag, august 26, 2007

Berre to på torsdag


Me padla frå Gråsidalen til Straumane, som nekta å få fart på seg. Litt keisamt, sidan me ville leika oss litt i den sterke tidevasstraumen som ofast er å finna her. Vart litt kjapt mørkt på vegen attende - difor flyttar kme fram padlingane med ein halv time frå neste padling.

mandag, august 20, 2007

Nytt forsøk

Det skal visst bli godt vêr på torsdag. Difor forsøkjer me opss nok ein gong frå klubbhuset/seilforeningen. Det vert mørkt rundt ti, så den heilt store ekspedisjonen vert det nok ikkje...

onsdag, august 15, 2007

AVLYST! Frå klubbhuset/seilforeninga

AVLYST PGA VÊRET Møt opp i Gråsidalen klokka 19 på torsdag, Vêr og vind bestemmer kvar me tek vegen, men om sønnavinden ikkje vert for sterk kan ein liten tur langs austsida av Hundvåko.

fredag, august 10, 2007

Fem gav seg pollane i vald



Trass i einskilde vindgufs til å byrja med vart det rett så fint på Heimarkpollen torsdagskvelden. Mew tok ut ved Åmundspollen, bisna litt ved Åno før me tok ein heller slakk hovudstraum ut frå pollen. Etter å ha skotta raskt på Blænestangen gjekk me inn i dei vakre Småstraumane, som fluat som ein dorsk flod. Øyredøyvande stille, som ein padlar sa. Forbi Heimark, inn i Slorkjen, deretter kryssa me pollen og gjekk inn i den pittoreske vika ved Naustheller. Fascinerande naust, i ein litt anna byggetradisjon enn det ein ser mange andre stadar i Austevoll, kan ein påstå. Til slutt spruta me attende til utgangspunktet, med ti kilometer tilbakelagd på dei halvannan timane me var ute.

torsdag, august 09, 2007

Teknikkurset avlyst

Kurset laur- og sundag er avlyst grunna særs mange forfall. Det er mogleg me vil forsøkja å setja opp eit slikt kurs i løpet av tidleg sommar neste år.

tirsdag, august 07, 2007

Frå Søreide

Grunna nord-vest vind tør me ikkje satsa på Fugløy og dei ytste øyane på torsdag. Under mottoet betre føre var enn etter snar vert det difor oppmøte ved brua ved Eido/Søreide klokka 19. Me padlar straumane fram og attende.

fredag, august 03, 2007

Nytt introkurs i august

Me arrangerer nytt introkurs i samarbeid med Aktiv sundag 26. august. Me leggjer til litt ekstra padling og åreposeredning i høve til tidlegare Aktiv-kurs i år. Pris kjem me attende til. Påmelding til 988 74 253 eller nytt e-postadressa til venstre.

Godt oppmøte - grei tur


Seks havstrilar tok turen langs Selbjørn-landet torsdag, trass i utsikter til regn og basje vind. Trass dette vart utflukta fin, den. Me padla først inn i Fagerbakkevågen og tok gamlehuset til Olepokai i nærare augesyn, forbi Slåttevikja og inn til Kalvaneset. Mange fine vikjer og ditto naust og sjøhus å sjå. Me padla inn forbi holmane i Veivågen, der yngelen lekte seg på grunna, og vidare mot Rabbavikja. Her tok me padlataka mellom Olsen-båtane "Nordervon" og "Norderveg". Ein kajakkpadlar veit som eit lite lauv samanlikna med fiskeskip på 70 meter. Yngve fann seg ly frå regnet med å leggja kajakken under gummibåt som hengde frå davitane på ein ein lystbåt. Deretter fekk me litt meir utfordrande tilhøve. Me svinga ut frå Rabben i retning Djupavågen fekk me bølgjer frå sida og litt kraftigare vind enn tidlegare på turen. Likevel var det ingen som hadde problem med å nå turens siste mål. På vegen heimatt fekk me ein liten surf å leika oss med, ogh me avslutta turen to og ein halv time etter me starta han.

Neste veke satsar me på start frå Kvalvåg dersom det visar seg å vera havblikk. Om det vert meir baskete vêr startar me ved brua ved Eido/Søreide/Åsmundpollen. Føl med på Havstril-bloggen.

onsdag, august 01, 2007

Invitasjon til Fitarøyane

Sunnhordland Padleklubb ynskjer å invitere til ein tur i Fitjarøyane laurdag
18. - søndag 19. august. Det vert ein rundtur med ei overnatting i telt ein stad ute i øyriket. Både røynde og mindre røynde kan vere med og ein deler seg i grupper dersom
det viser seg å vere praktisk. Den som er interessert kan kontakte Odd Bondevik som er formann i klubben og vil vera kjentmann/turarrangør.
Tlf.91805525 eller e-post odd.bondevik@haugnett.no

mandag, juli 30, 2007

Padletak frå Nordrevågen

Me padlar frå Nordrevågen på torsdag. Litlalunnøy, og vikene og øyane nord-vestover langs Selbjørnlandet er naturlege stadar å gli forbi. Oppmøte er klokka 19.00. Låna klubbkajakk? Gje Trond ein pling på 988 74 253 før klokka 12 same dag.

tirsdag, juli 24, 2007

Eksimorulle og redningstrening

Møt opp i Vassnesvatnet klokka 19.00 på torsdag og bli med på eksimorulletrening og fokus på rendingsteknikkar (kamerat- og utriggarredning).

Påmelding teknikkurs 11. - 12. august

Me får besøk av Torbjørn Nordeide som skal halda teknikkurs for oss den andre helga i august. Det er veldig mange som har meldt sin interesse, men ikkje har kome med formell påmelding. Vennligst gje snarleg tilbakemelding enten per epost eller per telefon 988 74 253 (send gjerne sms).

tirsdag, juli 10, 2007

Padling i ferien

Det vert ingen turleiarar frå padleklubben dei to neste torsdagane 12. og 19. juli. Likevel oppfordrar me medlemmar og andre å møta opp klokka 19 og bruka Gråsidalen som utgangspunkt for padling. Legg gjerne att ei melding i kommentarar i spalta under dersom du tenkjer å møta opp, slik at folk veit at fleire kjem.

Klubbkajakkane er ledige for lån av medlemmane og leige av andre. Malin Sørvik (924 38 538) har nøkkel til naustet i Gråsidalen denne veka (9.-15. juli), medan Alf Helge Møgster (55 08 69 11 / 95 29 19 11) tek hand om nøkkelen i veka etterpå. Som De veit kan medlemmar fritt benytta seg av kajakkane, medan andre kan leiga dei for 200,- døgeret.

fredag, juli 06, 2007

Vasseidet Krossøy rundt



Det var seks padlarar som møtte opp denne flotte torsdagen. Me tok ein liten omveg for å kika på hytta til ein gamal kjenning, før me vende kajakkane mot Krosshamn. Vêret var upåklageleg, nesten for fint, ettersom dei einaste bølgjene me støytte på i løpet av turen kom frå eit breidt utval av Tide sine fartøy. Etter å kome oss inn i ei av dei idylliske vikane på Krossøy - den som har ei rekkje sjarmerande bygningar som ei rame, og slått av nokre ord med ein av sommariburane, sette me årene i sjøen med kurs for Ryarbåsen. Dn kjempefine vika på vestsida av Krossøy er vel verdt turen. Denne dagen var det jamvel ein familie som hadde funne vegen dertil i båten sin. Den lokale faunen viste seg òg i form av ein verifiserbar krabbe. Tidlegare på eskapaden meinte ein av oss å kunna sjå ei enorm kveite under kjølen sin. Me avslutta turen med å padla gjennom sundet mellom Skårøy og Krossøy og strake vegen mot Vasseidet.

onsdag, juli 04, 2007

Møt opp i morgon

Torsdag er det klart for padling i nordleg retning frå Vasseidet. Oppmøte er klokka 19. Me legg i alle høve kursen mot Krossøy og kanskje vestover til Skår eller austover til Sandtorv. Ein god del folk har meldt at dei møter. Dessutan er det kajakklubbens eittårsdag. Det bør markerast med rekordoppmøte! Treng du klunnkajakk? Ring til Trond før klokka 14 i morgon!

fredag, juni 29, 2007

Med åra i skråma


Berre tre havstrilar møtte opp i går,men me hadde likevel ein fin tur inn i Austre Vinnesvågen, der to av oss leika oss med teknikk, kanting og anna moro. Utanfor Husavik, i Langenuen, gjekk dønningane opp mot land trass det stille vêret. Kjekt var det å leika seg med bølgjene ein halvmeter frå land. Seinare støtte me på ei ærfuglho med to keitete ungar. Dei stressa bortover vatnet som om dei hadde fanden i hælane, medan hoa dykka. Eit minutt seinare trekte ho luft berre nokre meter frå kajakken til Trond H. Morosamt. Me padla inn i vågen ved Blænes, og vart som i fjor ynskt velkomne av ein ilter, svart vofs. Til slutt enda me opp i den vesle laguna på Blænesøya. På vegen ynskte eit par store ravnar ønskte oss velkomne frå himmelen. Me hadde ein roleg retrett til ferjeleiet. Som vanleg var alle samde om at det hadde vore ein fin tur :-)

Neste veke tek me turen frå Vasseidet, dersom det ikkje er sterk nordavind.

mandag, juni 25, 2007

Me forsøkjer frå Husavik

Me tek turen frå Husavik på torsdag. Det er meldt regn og vestleg bris, men det treng ikkje å setja ein stoggar for oppmøtet? Vanleg tid klokka 19.00. Me padlar etter alt å døma til Blæneslandet og beyond. Låna klubbkajakk? Ring Trond før klokka 14 på 988 74 253 eller send e-post til info@havstrilpadleklubb.no så snart som råd er.

fredag, juni 22, 2007

Lite oppmøte

Det var vore lite oppmøte dei to siste torsdagane. I går var det berre ein som møtte opp, trass i relativt godt vêr. Me vonar at det skal bli btre oppmøte neste gong.

onsdag, juni 20, 2007

Frå Gråsidalen torsdag

Me padlar frå Gråsidalen torsdag. Utgangspunktet kan vera å padla i rundt Straumane.

lørdag, juni 16, 2007

Suksess med introkurs



Ni vordande havstrilar møtte opp då me hadde introlurs med sjølvaste Torgeir Toppe på laurdag. Askøyværingen la ut om åreval etter at han hadde spøkt med at Aktiv har fem dødsfall i sesongen på introkursa sine. Dermed vart i alle høve deltakarane spesielt merksame då han demonstrerte at løkka på spruttrekket alltid må vera på utsida av spruttrekket. Han meinte òg at vingåre er minst like brukbart til normal padling som ein klassisk variant.

Til slutt kom me oss på sjøen, utan den heilt store dramatikken. Torgeir meinte for øvrig at damer, som var hovudvekta av deltakarane, er flinkare til å nytta hoftene sine. Difor går dei sjeldan rundt på kursa, heller.

Turen gjekk til Hedlaheite-området der det vart fokus på diverse svingteknikkar. Etter kvart klarte dei fleste å svinga med å bruka kanting, og sidemanøvrane gjekk bra òg. Det var akkurat som å ha ein asimuth om bord.

Etter ein liten pause, der Marsteinen dukka opp (les han på torsdag!) og intervjua Torgeir og nokre av deltakarane. Var det duka for diverse redningsteknikkar. Kameratredning vart mellom anna gjennomgått av den gode Aktiv-karen.

tirsdag, juni 12, 2007

Frå Møllo

Torsdag vert det padla ut frå Møllo i Vestre Vinnesvåg. Kjør ned gamleveg og parker i svingen. Yngve er padleadmiral for dagen. Er det nokon som vil låna med seg kajakkar ut, ta kontakt med Trond i førevegen (seinast klokka 11 same dag - 988 74 253).

Til Åreleiken?

Er det nokon havstrilar som har tenkt seg å padla Åreleiken den 22.-23. juni? Ta gjerne kontakt med klubbleiaren dersom du skal til Sogn.

mandag, juni 11, 2007

Plassar att på introkurset

Me har enno relativt bra plass på introkurset på laurdag. Oppstart er klokka 10:30 i Gråsidalen. Instruktør er Aktivs Torgeir Toppe, tidlegare bronsevinnar i padle-VM.

fredag, juni 08, 2007

Kjempetur rundt Horgo



Heile sju havstrilar møtte opp då me skulle venda kajakkbaugane våre mot Horgo. Etter nokre tak måtte me lura om Ole Bjarte A. var på veg. Det blenkte i noko borte ved Hundvåko-landet. Var det ei blåse eller var det ein kajakk? Nokre minutt seinare var me alle mann alle, komplettert med ivrig hundvåkar.

Me padla på sørsida av Bakholmen, og forbi Melingvågen. Alt i total stille. Berre ryggsøylene til ein liten flokk - eller kallast det stim? - med niser braut overflata. Me to oss forbi hytta til Tor Ø., som same kveld mottok kongens fortenestemedalje i gull, og vidare utover mot målet.

Like før me kom fram til Austrevågen, fann to av padlarane ut at nok var nok, og gjorde vendereis. På det tidspunktet kunne dei fremste av oss skimta skorsteinen på huset som kommunen eig, og BOF disponerer. Inne i den avskjerma vågen kunne me beundra sandbotn, medan den mest røykehundrige av oss fann ut at det var på tide med litt ekstra frisk luft. Andre peiste i seg med sjokolade eller nøtteturblanding for å retta litt på blodsukkertnivået.

Så tok me avgjerda om at me ville forsøkja oss på vestsida. Trass alt er det sjeldan vêret er såpass i godlaget. Rett på nordvestsida kunne me konstatera at dønningane runga inn i det steile berget. Refleksbølgjene førte til at ein beint måtte ha tunga rett i munnen og til og med jobba ein del med hoftene for å halda båten på rett kjøl.

Me kom oss inn i det trange sundet ved Horgekalven, og kunne beundra rullestein. Den lokale fuglefaunaen og ein liten encore med niser før me kom ut att i ekspondert farvatn. Det var moro med litt adrenalin etter å ha padla på det flataste av flatvatn i nesten to timar. Spesielt ved eit nesten firkanta skjer på sørvestsida bruat det kraftig. Dette merka me på innsida. Det var nok mindre enn 50 meter frå skjeret til land. Og det gjekk opp og det gjekk ned. Møkstrafjorden kan vera mektig sjølv på strålande finvêrsdagar.

Etter omlag 30 minutt med underhalding, runde me Horgetrynet og var på flatvatn att. Nokre av oss støtte nesten bokstaveleg tala på ærfuglungar, medan mange vaksne av arten dynefyll var å sjå. Me kom oss til slutt i land etter å ha padla 16,8 kilometer med ein snittfart i underkant av 6 kilometer i timen. Turleg ein av dei aller finaste og i alle høve mest varierande torsdagspadlingane me har hatt så langt!

Har De noko å kommentera frå turen eller padletips i området? Nytt linken under og kommenter!

Neste veke er det avgong frå Vestre Vinnesvåg. Ta gamlevegen ned i vågen. Meir informasjon kjem før torsdag!

søndag, juni 03, 2007

Rostøy - Horgo på torsdag

Dersom vêret hald seg, kjemme til å setja kursen for øyane vestom Melingsvågen på torsdag. Me "set segl" klokka sju (ver klar "sharp"). Er det ideelle tilhøve vågar me oss heilt til Horgo. Er det nokon som vil nytta klubbkajakkane, er det fint om de gjer medlig om det før lunsj på torsdag. Ring Trond på 988 74 253, så kan han ordna med transport av minst ein båt til Rostøy. Me brukar slippen som "launch pad".

fredag, juni 01, 2007

Fire på tur


Til tross for sommartemperaturar og speilblank fjord så var det berre fire havstrilar som stilte opp i Kolbeinshamn for å ta føre seg Haukanespollen på torsdag. Me var litt uheldige med tidevatnet då me skulle inn i pollen, og hadde sterk straum i mot. Det vart nokre harde padletak, og føltest mest som motstraumsrafting, men alle kom seg igjennom. Det var ikkje ei krusing på pollen, og heilt utan motorbåtar eller anna trafikk så var det mest som å padla i audemarka. Men så var det jo også innlandsaustevoll me tok føre oss. I den neste straumen var det låg vasstand, men straumen her var mykje svakare, så med roren oppe var det lett å komma seg inn til neste poll. Me padla heilt inn til Eido, og det er mest underleg å tenkja på kor smal Huftarøy er på dette punktet.

Då me skulle ut av pollen hadde straumen stilna mykje av, og me fekk ikkje den elvepadlingopplevinga som me hadde gledd oss til. Ein runde inn i Austre Storebøvågen og Kvernsmolt vart det også tid til i det fine vêret. Me konkluderte med at det var ein strålande og avslappande tur i det fine veret. Austevoll har mykje å by på, både inna- og utaskjers.

tirsdag, mai 29, 2007

Haukanespollen torsdag

Møt opp i den vesle vika før du er kjørt heilt ned til Kolbeinshamn og ver med å padla Haukanespollen heilt inn til den vidgjetne Ordførarsvingen: Nina M. leiar for Havstril.

16 000 frå SpV


Havstril var ein av dei heldigaste då Sparebanken Vest delte ut grunkar til lokale allmennyttinge føremål. Me stakk av med heile 16 000 kroner, som me vonar skal helda til innkjøp av ein kajakk for ungdom eller ein småvekst vaksen. (Foto: Havstril-leiar Trond Hagenes tok i mot prov på 16 000 i støtte frå SpV, fotograf: I.M. Fagerbakke, Marsteinen).

mandag, mai 28, 2007

Kjekt på kurs



Smekkfullt kurs med Aktiv på andre pinsedag. Det kjem reportasje på heimesida etter kvart. Her er nokre bilete frå mandagens moro på ein speglblank Heimarkpoll. Rutinerte Eilert Winther var hovudinstruktør, medan "Keiko" frå Bergen-butikken til Aktiv var hjelpemann. Rune frå Havstril vart med for å dokumentera det heile. Totalt var det ti deltakarar på kurset. Me held eit identisk kurs den 16. juni. Det er berre å melda seg på!

fredag, mai 25, 2007

Fint på austsida

Trass i grått vêr og regn var det fire havstrilar som sette ut frå Vasseidet. Me tok nokre padletak sørover, nesten heilt åleine på havblikket. Dei fleste av oss var ukjende med akkurat desse farvatna, og vart overraska over det området hadde å by på.

Me følgde Huftarøya heilt inn til munningen av Haukanespollen, deretter bisna me nærare på Kumløyi, Eidholmane (der Ole Rasmus i nærleiken har reist seg ei kjempefin, men i storleik nøktern hytte). På vegen attende stakk ein av oss heimoverm, medan den attståande trioen padla inn i Paraket.

Neste veke vert det padling med avgong vika inne i Kolbeinshamn. Målet er padla Haukanes-, og Ytrepollen til ende.

tirsdag, mai 22, 2007

Teknikkurset flytta

Grunna at mange av interessentane til teknikkurset vårt ikkje kunna delta helge med 9. -10 juni, protesterte me ikkje då instruktør Torbjørn Nordeide ville flytta kurset grunna dobbelbooking frå NPF. Ny dato er 11.-12. august.

Frå Vasseidet

Me prøv ar oss frå Vasseidet (på slutten av Birkelandsvegen) på torsdag. Alt etter vêr og vind og andre tilhøve sjekkar me ut Paraket og øyane utanforbi Austre Storebøvik.

Nesten fullt introkurs

Me har enno eit par ledige plassar på introkurset den 28. mai. Dei som haer lyst å vera med må dermed skunda seg! Elles set me opp eit nytt kurs den 16. juni, som er ein laurdag. Då vert oppmøte Gråsidalen, og det vert etterfølgd av kajakkdemo. Havstril-medlemmane får sterkt reduserte prisar ved kjøp av kajakkar og anna padleutstyr.

mandag, mai 21, 2007

PR-framstøt i Vikjo

Havstril mønstra med "Eldjarnet" og eit par andre kajakkar i Bekkjarvik på laurdag. Etter at det klarna opp, fekk ganske mange skodelystne prøva seg i K2-en vår. Mange var interesserte og stilte spørsmål om klubb, båtar og kurs. (Foto: Andreas Møgster fekk prøva seg med padleåra saman med dagens Havstril-primus motor Nina Møgster)

fredag, mai 18, 2007

Aktiv tek over introkurset

Grunna formalistiske saker, tek Aktiv AS over kurset som Njord skulle arrangera for oss den 28. mai. Innhaldet vert så og seia det same som det elles ville vore. Kajakkmodellane vert litt ansleis, men dette vil knapt merkast for nybyrjarar.

søndag, mai 13, 2007

17.-mai padling

For dei som lurte på det, tek me ikkje sikte på å padla med flagga til topps og laga langt kajakkonvoi på nasjonaldagen. :-) Ta med kajakken til Bekkjarvik på laurdag. Me prøver å laga litt ekstra blest om klubben i det det skjer mykje i Vikjo den dagen.

fredag, mai 11, 2007

Tilbod om klubb-piqué


Vil du ha ei piquéskjorte av god kvalitet med klubblogoen brodert? Då har du sjansen for den nette sum av 300,- Me tek imot bestillingar, men tingar ikkje før me har minst 15 tingingar. Send sms 988 74 253, ring same nr eller nytt mail.

Straumane og motvind



Berre fire sjeler torsdag. Kvalitet er viktigare enn kvantitet, som det heiter. Dessutan ein merkedag fordi me hadde med den første hundvåkaren på fellespadling: Ole Bjarte. Uansett: Me padla frå Gråsidalen via Hyltropollen til Ministraumen (:-P) og rundt Straumsøya, gjennom Småstraumane og attende. På vegen sørover fekk me litt bølgjer (nesten surf) på vegen. Litt utfordrande viss du gjekk litt på tvers og fekk bølgjer og refleks inn frå sidene. Heimatt var det heftig motvind og ditto bølgjer, men sidan alt var regelmessig var det berre å bita tennene saman og padla på. Fekk litt sjø i trynet, og var for første gong på lenge glad for spruttrekket mitt.

Prøvde Inukshuk-en for første gong. Ein kjempebåt. Stabil, men litt moro likevel. Av polythylenkajakkane er har prøvt den aller beste. Spesielt fin med desse bølgjene som kom inn frå sida. Med siroccoen hadde eg nok slite ein del meir...

TrH

tirsdag, mai 08, 2007

Invitasjon frå Sunnhordland padleklubb

"Vil invitere dei av dykk som har tid og lyst på padletur i dei flotte Fitjarøyane i lag med oss i Sunnhordland Padlklubb og evt. andre i pinsa. Me legg ut laurdag ca kl14.00 (frå Fitjar sentrum dersom vi vert mange)og satsar på ein tur med ei overnatting i telt muligens på Slåtterøy.
Har ikkje lagt opp rute eller program så det vert å ta med godt humør, mat og drikke og det ein elles treng for turen og så ta ting litt på sparket. Det er ikkje naudsynt med påmelding men det er sjølvsagt kjekt om de melder interesse anten til meg eller ein av dei andre i styret."

Kontakt: Kjetil.hjelle@haugnett.no, kjetil.hjelle@vik-sandvik.com
Mobil 95277189, heime 53499018, arbeid 53457084

mandag, mai 07, 2007

Møt opp torsdag!

Padledagen går frå Gråsidalen klokka 19.00. Nina har snakka med Marsteinen, som sender ein journalist som skal skriva om klubben. Difor hadde det vore nydeleg med litt ekstra aktivitet og mange kajakkar på vatnet. Det kan verta aktuelt å padla Småstraumane, eller Rostøy and beyond alt etter vêrtilhøva, som no ikkje ser så verst ut.

søndag, mai 06, 2007

Heimesida lansert!

I dag vart Havstril padleklubb si heimeside endeleg gjort tilgjengeleg for alle etter si god stund med førebuingar. Det er styremedlem Rune Hugøy som har designa sidene. Bloggen kjem til å bestå som klubbens nyhendekanal.

fredag, mai 04, 2007

To på tur

Trass i finevêret var det berre to padlarar som møtte opp på Rostøy og sjøsette båtane sine ved slippen der. Me padla inn Drønspollen, kika litt rundt i Busesundet, før me tok sama vegen attende. Me vurderte ikkje å ta turen vestom grunna små, krappe bølgjer. Ein heilt grei vårtur, med andre ord.

onsdag, mai 02, 2007

Trynebok-gruppe

For dei som driv med slikt, kan det seiast at du finn ei Havstril-gruppe på facebook.com.

fredag, april 27, 2007

Frå Rostøy klokka 19

Neste torsdag (3. mai), satsar me på å padla frå Rostøy klokka 19 (dette vert fast tidspunkt for torsdagspadlingane vidare). Dei som vil nytta klubbkajakkane må melda frå om det på førehand, slik at dei kan hentast i Gråsidalen. Trond kan ta med seg ein ekstra kajakk på taket av bilen sin, dersom det er ønskje om det.

Jomfrutur med "Eldjarnet"


Etter at tåka letta på torsdag var det fine tilhøve då fire havstrilar tok turen frå Gråsidalen, via Hyltropollen gjennom straumane og attende til Storebø. Inne i den nedlagte oppdrettspollen støytte me på ei lita siland som spelte skadd for å trekkja merksemda bort frå reiret sitt som nok var like i nærleiken. Fleire andre stadar skremde me opp dykkender, så det er tydeleg at det ikkje står så ille til med den lokale hekkebestaden. Før øvrig er det gamle huset på den vesle holmen inne i Hytropollen framleis utstyrt med elektrisitet, så kanskje me kunne laga klubbkontor der inne? Uansett er det ingen dre farkostar som kjem seg forbi dei smale sperringane i enden av pollen. Men rydda opp etter seg burde Havforskingsinstituttet gjort.

Rune og Trond padla "Eldjarnet" på turen etter at me hadde fotografert førstnemde og Nina i fullt driv for den kommande heimesida til Havstril (sjå bilete). Trass i at båten er brei og så fjellstø at du knapt merkar bølgjene får du opp dampen når du padlar på litt. Dei to herrane hadde ingen problem med å leggja k1-ane i kjølvatnet då dei måtte skunda seg attende til Gråsidalen for å rekkja dei respektive avtalane sine seinare på kvelden.

tirsdag, april 24, 2007

Gratulerer Malin og Nils Ove!

Padleklubben vil senda ein varm gratulasjon til Malin og Nils Ove som fekk seg ei velskapt dotter i går. Me kryssar fingrane for ein havpadlar in-spe! :-)

mandag, april 23, 2007

Nok eit forsøk frå Gråsidalen

Vêr og andre hindringar har sett stoppar for det store oppmøtet på torsdagspadlingane dei to siste vekene. Me vonar på betre forhold enn fire årstider på tre minuttar denne veka. Møt opp klokka seks i Gråsidalen om du vil vera med. Me har parkert dei aller fleste klubbkajakkane i seglarnaustet, og dei kan nyttast dersom det er interesse for det. Fleire ulike interessante eigenskapar hos kvar båt. Leiaren har dog reservert "Furen" (altså Inkushuk-en), som han har lyst til å endeleg få prøvt litt.

fredag, april 20, 2007

"Eldjarnet" parkért i naustet


Etter å ha støva ned hos Aktiv i C. Sundsgate i Bergen kom til slutt Boreal Designs Esperanto-en vår. Båten har mellom anna fått strålande kritikk frå magasinet "Padling", og bærer all mogleg preg av å vera ein solid farkost. Båten er likevel så tung at det trengst to personar for å få han på vatnet eller opp på biltaket.

tirsdag, april 17, 2007

Flytta torsdagspadling

Grunna fryktelege vêrmeldingar flyttar me torsdagspadlinga til Haukanespollen. Start klokka 18.00. Me bærer kajakkane frå parkeringsplassen like ovanfor brua ved innlaupet.

Ny økt frå Gråsidalen

Sist torsdag var det særs dårleg oppmøte for torsdagspadlinga. Mange sparte seg sikkert til sundagens langtur. Difor tek me sen turen me då hadde planlagt, med utgangspunkt i Gråsidalen. Me padlar innover mot straumane og Eido. Vêrmeldingane fortel om regn, men det bør ikkje setja ein stoggar for iveren når vårvarmen er komen.

mandag, april 16, 2007

Kjempeflott på Bømlo





Fem havstrilar storkosa seg med 23 milometer padling - tilbakelagt på i underkant av fire timar, pause ekskludert. Me sjøsette farkostane våre ved Spissøy, og tok dei få åretaka mot Røyksundkanalen. I sundet kunne me i og for seg hengt oss på ei bryggje som var under slep. Allereie litt etter klokka ti var det varmt å padla. Vårsola hadde teke eit solid tak om oss, og vart følgjesven heile dagen.

Røyksundkanalen låg stille som det blankaste, nypussa speglet. Me observerte godt med velvaksne blåskjel under floa, som var på veg ned, og dermed gav oss litt hjelp vestover. Me passerte eit aude badeland og den gamle handelsstaden like ved utlaupet av kanalen.

Så bar det langs kysten av bømlolandet, som viste seg rikt på sjøfugl og ender. Mange fiskeender var å sjå, sjølv om dei vart skremte opp så langt unna at ein måtte ha særs god kontroll over ornitologien for å artsbestemma dei. Tjelden var meir samarbeidsviljug og me kom retteleg nært fleire par, som sikkert er i ferd med å laga reirplassane ferdig for ruging og ungeproduksjon.

Etter kvart kom me nærare Kuleseidkanalen, på vegen observerte me eit byggverk som sikkert har vore reist av nokre unggutar eller styvingar. Skal tru om dei har innhenta byggjeløyve? For om ho ikkje akkurat var vinterisolert, ruva ho med sine tre-fire kvadratmeter på den vesle holmen der ho var sett opp.

Etter nesten halvannan time var me endeleg i Kuleseidkanalen. Fascinerande å sjå korleis dei i gamle dager løyste problem, med å sprengja ut og laga nye farleier. Om dei to kanalane ikkje akkurat er Suez- eller Panamakanalen, er det likevel påminningar om oppfinnsame menneske før om åra. På vegen forbi gjestebryggja utveksla me høflegheitsfraser med dei som sola seg om bord i båtane der inne. Heldigvis ikkje så mange børsfiffar som briska seg på flybrigden denne tidlege vårdagen.

Me vart raskt kaffetørste då det gjekk opp for oss at me var komne til enden av kanalen. Me spurde ein familiekar som me traff i ein Boreal Inukshuk om gode plassar for å rasta (han drog faktisk opp ein liten lyr med fiskestonga då me trefte han), ogt me enda opp med å grilla pølser og eta nista ved ein flott lita trebryggje med ditto båthus.

Etter kos og påfyll av drivstoff sette me vegen attende. Me tok same ruta, og kunne mellom anna observera alle dei flotte, raudeaktige anemonane som har klort seg fast lange kanalveggane. I Røyksundkanalen var vasstanden meir enn ein meter lågare enn då me padla inn.

Så tidleg i sesongen kan det i alle høve ikkje stikkast under ein stol at einskilde av dei som var ute og padla kjende seg retteleg slitne etter dei fire timane og 23 kilometrane me hadde tilbakelagt.

Tekst: Trond Foto: Rune

fredag, april 13, 2007

Klar til sundag og k2 på plass

Det er seks påmeldte til Bømlo-turen sundag. Møt opp og vert med på vårens morosamaste padletur i kanalriket sørom oss.

Me har fått inn pengestøtte på heile 16 000 kroner frå Østervold Management på Austevollshella og kan endeleg henta heim k2-en vår. "Eldjarnet" skal denne båten heita, og trekkjer dermed ein slags tråd til fiskeriverksemda til familien Østervold. Me er særs takksame for den massive støtta frå Olav H. og resten av familien.

Tandemkajakken er av typen Boreal Design Esperanto, som har fått gode meldingar, mellom anna i bladet Padling.

mandag, april 09, 2007

Torsdag frå Gråsidalen

Bli med og padla Heimarkpollen på torsdag. Det er meldt regn og sørleg vind, men me kryssar fingrane for gode padleforhold. Klokka 18 er oppmøtetidspunkt.

fredag, april 06, 2007

Tid for å melda seg på Njord-Symposium

Første helga i juni er det grunn til å kryssa av på kalenderen. Då går Njord sitt havpadlesymposium av stabelen på Sotra, nærare bestemt Langøy kystkultursenter. Mykje moro, frå testing av klassiske eskimokajakkar, til møte med den levande legenda Nigel Foster. Fleire importørar av kajakk er til stades med demoar, og det vert høve til å ta fleire ulike NPF_ og Njord-kurs. Minst ein havstril er allereie påmeld!

torsdag, april 05, 2007

Tynt i rekkene

Berre to styremøtemedlemmar møtte opp for å padla frå Beinskrokjen i dag. I grått vêr var ikkje Busepollen den aller finaste, spesielt sidan det av og til var små kastevindar, men dei kom alltid frå nord, så det var aldri noko problem. Pollen er full av blåskjell, så her er det nok mykje godt å henta både for sjømathungrige og tjelden på lavvatn. Me kom oss inn att etter halvannan time, etter ein grei tur utan store hendingar. Dog var det ein del sjøfuglar å sjå, men det er nok ikkje så lett å jakta frå kajakk, med mindre du klarar å komma opp med vinden, slik at dykkendene er tvunge til å ta av i retningen din.

tirsdag, april 03, 2007

Hugs Bømlo-turen

Still opp på ferjekaien på Husavik sundag klokka 0900 den 15. april og vert med på å padla Røyksund- og Kuleseid- kanalane på Bømlo. Me kjører over brua frå Stord og kan byrja padla nesten med ein gong. Ta med god niste (gjerne noko grillkol, pølser etc) for pause under vegs. Med mindre det vert ofseleg sterk sønnavind er dette som ein rein kosetur å rekna. Me legg opp til at du anten kan padla litt over ni kilometer, eller to timar i moderat padletempo, eller det dobbelte om du vil. Dei som padlar ni kilometer tek drosje attende for å henta bilane sine ved Spissøya. Klubbkajakkane er tilgjengeleg for dei som ønskjer å nytta dei. Me har sikkert avgrensa takstativplass, men Trond har i alle høve plass til ein ekstra kajakk på taket. (kart: faksimilie frå http://kart.kystverket.no)

lørdag, mars 31, 2007

Skjærtorsdagpadling

Padla i påskehelga? Møt opp ved småbåthamna i Beinskrokjen klokka 11 på skjertorsdag. Avhenging av vêret tek me enten Drøno rundt, eller berre pollane.

fredag, mars 30, 2007

Brufeste, Råtapollen, Rostøy og tilbake til Gråsidalen



Perfekt vårsol og eit hav roleg som eit stovegolv, gav oss gode ramer til å verta litt varme under skjorta etter ein altfor lang vinter i padleopplag. Me sette ut frå Gråsidalen klokka fem, og navigerte nordover for å bisnast litt på bruarbeida mellom Austre bakholmen og Hundvåko. Me la oss å venta på at anleggsferja la seg til før me sprinta fordi straumvirvlane frå propellane i det "Tjelden" òg kom forbi, utan å laga bølgjer grunna den låga farten sin. Me tok strekket sørover langs land og inn i Råtapollen, som alltid er idyllisk. Me skoda ein mann og Kongsvarden ved Melinga, før me la i veg austover til Rostøy, der Rune gav seg for dagen (måtte rekkja volleyballtreninnga, må vita). Dei fire som var att heldt fram i Rostøysundet, og beundra Jostein Blænes sine skjeringar på Bjånesøyi. Til slutt kom me oss inn til Storebø att, og me nytta nokre minutt til inspeksjon av lagringsplassen til kajakkane i seglarnaustet. Her kjem me nok til å få plass til seks til åtte kajakkar.

søndag, mars 25, 2007

Torsdagsturen: Frå Gråsidalen

Klokka er stilt og det vert dermed lysare om kvelden. På torsdag tek me turen ut frå Gråsidalen og padlar rundt øyane litt sørover viss vêret framleis held seg fint. Dersom det vert uventa vind, flyttar me utpadlingspunktet til småbåthamna i Beinskrokjen. Tidspunkt for oppmøte: Klokka 17:00.

torsdag, mars 22, 2007

Straumane i vald

Sesongens første torsdagspadling starta tidleg. Litt før klokka fire frå Heimark. Me leika oss stort sett i Småstraumane - som var veldig sterke i dag. Den nye Buccaneer-en fekk sjø under kjølen for første gong, men me hadde visse problem med roret, som me må sjekka opp i før han er klar for generelt medlemsbruk.

Turen på akkurat to timar var uansett kjempeflott - knallsol på ein varm ettervintersdag. Kva anna kan ein gjera enn å sei seg hjartans samd med Rune "Detta e' livet!"

søndag, mars 18, 2007

Ikkje berre-berre

Fleire havstrilar fekk slita med å gjennomføra eskimorulla då me hadde trening på sundag med Torbjørn Nordeide som gjestande instruktør (som diverre var seinka fordi han gjekk av ferja på Austevollshella). Havstril-leiaren slit framleis med balansenerven i øyra, og måtte gje seg tidleg, medan ein og to andre også fekk smaka på kvalmen. Men unge Solbakken fekk i alle høve dreisen på sakene.

Dei som vil padla viss det vert fint vêr på torsdag kan møta opp på kaien på Heimark klokka 15:30. Eit par raske timar i staumane står på menyen.

lørdag, mars 10, 2007

Bassengtrening utsett

Instruktør Nordeide er har meldt avbod pga sjukdom, og bassengtreninga på Austevoll ungdomsskule vert difor 18. mars klokka 13:00 i staden.

fredag, mars 09, 2007

Ny kajakkforretning i Bergen

På jakt etter Valley-kajakk? Då kan du ta turen innom den nye padlebutikken til Kyrre som tidlegare arbeida for Torgeir Toppe og Aktiv. Butikken, som ligg midt i strøket - C- Sundtsgt 64, har òg ei nettside som er oppe og går - den canadiske fabrikanten Riot har nokre båtar som kanskje kan verta aktuelle som klubbkajakkar ein gong i framtida.

tirsdag, mars 06, 2007

Styremøtet 5. mars

Styret i padleklubben konstituerte seg i går. Trond Hagenes er attvald som leiar. Nestleiar er Nina Møgster, kasserar Liv Bente Storebø og styremedlem Rune Høgøy. For sistnemnde møtte varamann Nils-Ove Sørvik. Me hadde mange interessante saker oppe, og det vart mellom anna bestemt å forsera innkjøp av ein K2-til klubben (sjå foto). Me kjem òg med gode tilbod til ungdom som vil prøva padling. Me har endra Bømlo-turen frå 1. april til 15. april. Dette grunna at mange nyttar pinse- og påskehegene med ski på beina. Det vart og bestemt at første torsdagspadling vert 29. april, då har me justert klokka ein time. 18. mars satsar me på ein rask sundagstur i Heimarkpollen. Me er i ferd med å laga statuttar for lån av klubbkajakkar, og praktisk handtering sjølve låna.

lørdag, mars 03, 2007

Stadfesta kajakkparkering

Padleklubben får plassert kajakkane sine i Seilforeningens klubbhus i Gråsidalen. Me kjem til å la våre "in-house carpenters" laga stativ til oss, slik at me får maksimalt utav plassen vår, som tilsvarer ein oselvar (men me byggjar altså i høgda). Mellombels har me ikkje retteleg plass til Inukshuken i Bekkjarvik, men det er jo heller ikkje så mange steinkasta til leiarens hage.

tirsdag, februar 27, 2007

Eksimorulletrening 11. mars

Sundag 11. mars er det berre å møta opp i bassenget på Austevoll ungdomsskule. Torbjørn Nordeide kjem for å ausa av kunnskapane sine når det gjeld å gjennomføra den vidgjetne grønlenderrulla. Det vert oppmøte klokka 13, og me held det gåande nokre timar. Påmelding per sms, telefon eller e-post. Det kostar 130,- å verta med på kurset. Det er berre ope for medlemmar av Havstril.

Hasle til klubbpris

Er du framleis interessert i å eiga kajakk? For rekreasjonspadlarar som likar å vera i ein kajakk som er stødig som fjell er Arne Hasle sine produkt absolutt noko å anbefala. Me har fått til gode prisar, som gjeld levering på ferjekaien. Sjekk denne lenken for sjølve tilbodet.

Ny heimeside

Padleklubben har endeleg fått eige domene. Etterkvart vil me fylla opp med ulikt padlestoff. Har du tips om kva me skal ha på modersida til bloggen vår? Kom gjerne med tips. Nytt adressen vil venstre.

torsdag, februar 22, 2007

Finansiering av tredje klubbkajakk på plass

Me har fått nok sponsorar til å kjøpa inn nok ein kajakk. Denne gongen er det ein retteleg krembåt - ein North Shore Buccaneer, med eit skrog som liknar litt på ein klassisk grønlandskajakk - og som er utruleg kjekk å padla. Båten kjem med ror, og skal oppbevarast sentralt på Storebø til bruk for medlemmar og andre padleinteresserte.

Takk til Austevoll kraftlag BA, Flyfisk AS, Advokat Andreas Iversen AS, Hordafor AS, North Sea Shipping AS, Alfa Engineering AS, BioMega AS, PlanConsult AS og Marine Support AS for støtta til innkjøp av kajakken.

(Foto: Ut i Naturen, Arnt)

Saker til styremøte 5. mars

Har medlemmane noko som bør takast opp av Havstril-styret? Skriv ein mail eller ta ein telefon til Trond før den 27. februar. Saker som mellombels står på agendaen er konstituering av nytt styre, reglar for utleige av kajakkar (til ikkje-medlemmar - krav om våttkort etc.), open kajakk-/demodag i slutten av mai/byrjinga av juni, tilbod til unge padlarar (me har t.d. ingen medlemmar under 26 år - noko me må gjera noko med).

søndag, februar 18, 2007

To kajakkar heim til Austevoll



Havstrils to første klubbkajakkar er på plass. Det eine er ein brukt Current Designs Sirocco, kjent for mange av dei som har vore på kurs med Njord (som me òg har kjøpt kajakken vår frå). Det andre er ein Boréal Designs Inukshuk, som me har kjøpt fletta ny frå Aktiv i Bergen, med massiv rabatt. Me takkar Torgeir for tilbodet og ønskjer meir samarbeid i framtida!

Inntil vidare er kajakkane stasjonert heime i hagen til Trond, men kan lånast av alle medlemmar. Me kjem attende med pratisk informasjon i løpet av mars, då me har styremøte og òg får stadfesta kajakkparkering i Gråsidalen. Inukshuken vil uansett verta stasjonert i Bekkjarvik, gjerne hos gjestgiveriet, men me kjem attende til dette.

Båtane er innkjøpt med støtte frå næringslivet, og me vonar at dei kan vera med å stimulera ungdom, studentar og andre ut på bølhjan blå. Me kjem attende med roll of honour over hjelparane seinare, men me er uansett særs takksame for sponsinga så langt. For ja, det kjem garantert meir på dette feltet i løpet av ein liten månad.

torsdag, februar 15, 2007

Sparkjøp sponsar vestar

Me har fått seks padlevestar frå Sparkjøp, som kan nyttast av klubbens medlemmar. Havstril takkar Tom Eide Knutsen i Sparkjøp for støtta. (Foto: Sparkjøps nettkatalog).

tirsdag, februar 13, 2007

Klubbesøk 10. mai

Torbjørn Nordeide frå NPF kjem og vert med på fellespadlinga 10. mai! Set allereie no av kvelden for padletur, teknikk- og anna kajakkprat!

mandag, februar 12, 2007

Kjenn på iskanten

Tre havstrilar tok seg ein fin liten tur måndag. Gjennom strandline på Busepollen, fekk me sjå nærare på det gamle steinbrotet, og ikkje minst støte på isen inne i vikene. Denne årstida er flott å padla på - men hugs at marginane er mykje mindre dersom du skulle gå rundt. Tørrdrakt vert anbefalt av dei fleste.

lørdag, februar 10, 2007

DVD-ar på veg

Som ein lekk i å byggja opp eit lite klubbmedia-/bibliotek, har Havstril no tinga DVD-trilogien "This Is the Sea". Vert drege fram som referansestoff om den wünderschöne hobbyen (eller var det lidenskapen?) vår.

fredag, februar 09, 2007

Endå ein kajakk får grønt lys

Takka vera K. Halstensen AS med Christian i brodden får Havstril padleklubb endå ein kajakk klar før sesongstart. Dette er ein splitter nye Boreal Inukshuk med utstyr, som Aktiv i Bergen gjev oss heile 32 % rabatt på. Denne kajakken vert truleg stasjonert i Bekkjarvik - til fri bruk for klubbens medlemmar.